پاڪ فقير: ضلعي نوشهري فيروز جي تعلقي ڀريا سٽي کان ٻه ڪلوميٽر اتر طرف پاڪ فقير جي درگاهه آهي. هيءَ بزرگ ڪيرين جي قبيلي سان تعلق رکندو هو. درگاهه ۾ ٻه تربتون آهن، جن مان هڪ پاڪ فقير جي پٽ جي چئي وڃي ٿي. درگاهه جي اتر ۾ هڪ مسجد به اڏيل آهي. هن بزرگ لاءِ مشهور آهي ته هالن واري مخدوم نوح سروريءَ جو خاص خليفو هو. علائقي ۾ رهندڙ چانڊين جي قبيلي جا ماڻهو ساڻس وڌيڪ عقيدت رکن ٿا. هر مهيني جي پهرئين سومر تي هتي لنگر نياز تقسيم ڪيو ويندو آهي. هتي جججهي تعداد ۾ ماڻهو زيارت لاءِ ايندا رهن ٿا. هن وقت درگاهه جو مجاور فقير ڪيريو آهي. درگاهه جي آسپاس عيسن سوائي ۽ پير ڪُنڍي جون درگاهون به مشهور آهن. هنن درگاهن جي آسپاس باغ آهن، جنهن سبب هي جايون شهر جي نوجوانن لاءِ شام جي وقت تفريح جو باعث به بڻيل آهن.